2026 жылдың 20 ақпан күні жалпы білім беретін мектеп оқушылары арасында Жамбыл Жабаевқа арналған «Жыр алыбы – Жамбыл» тақырыбындағы жас ақындар айтысының облыстық кезеңі өтеді.
Айтыс екі номинация бойынша өтеді:
- Тақырыптық айтыс.
Бұл жерде оқушылар Жамбыл Жабаевтың өмірі мен шығармашылығын, жалпы елдегі хал-ахуалы туралы жырлау керек, бір-біріне мәнді де мағыналы жауап қайтара білу керек.
- Қайым айтыс.
Қайым айтыстың негізгі шарты - айтысты бастаған қарсыластың айтқан өлеңінің ұйқасын бұзбай, алғашқы екі жолын мағыналық тұрғыда ғана сәл өзгертіп, немесе сол қалпында сақтап соңғы екі жолында жауап қайтару. Қайым айтыс - нағыз суырып салмалықты, шапшаңдық пен тапқырлықты басты талап қылып, жедел ой қорытып, салмақты жауап қайтаруды қажет ететін айтыстың ең қызық түрі.
Айтысқа 7-11 сынып оқушылары қатыса алады. Әр аудан республикалық айтыстың облыстық кезеңіне әр номинация бойынша 1 (бір) үміткер (әр ауданнан 2 үміткер) ұсынады.
Айтыстың облыстық кезеңін ұйымдастырушы: Жамбыл облысы әкімдігінің білім басқармасының «Жамбыл дарыны» аймақтық ғылыми-практикалық орталығы
